طريقة عمل كنافة بالمانجو

كل عام وانتو بخير وسلامة
عيد سعيد عليكم
وان شاء الله العيد القادم يكون ربنا فرج كرب مصر وسوريا
طبعا مش معقول معملش أى حلويات بالمانجة وانا عايشة فى بلد المانجة(مدينة الاسماعيلية) فعملت كنافة بالمانجة بسيطة جدا فى مكوناتها وطريقتها
ومكوناتها كالتالى:
600 جرام مانجة عويسى(او اى نوع تانى)
نصف كيلو كنافة
كوب سمنة سايحة
كوب سيرب تقيل بارد(السيرب هو الشربات او القطر او الشيرة)
كريم شانتى
الطريقة
هنحمر الكنافة فى السمنة السايحة على نار البوتاجاز(وممكن فى الفرن) ولما تاخد اللون الدهبى هنطفى عليها ونحط عليها السيرب البارد ونقلبها كويس
هيبقى شكلها كالتالى

وهنقسم الكنافة نصفين
النصف الاولانى هنحطه فى الصينية ونضغط عليه كويس جدا

هنبدأ نعمل الكريم شانتى عشان نحشيها
هناخد نصف كمية المانجة اللى عندنا ونضربها فى الخلاط من غير سكر مع نقطتين مياه عشان تكون مركزة
اضغطي هنا لمشاهدة الصورة بحجمها الأصلي

وهنحط على عصير المانجة بودرة كريم شانتى خام وسكر بودرة ولبن مثلج ونضربهم كويس

ونبدأ نحط الكريم شانتى على الكنافة

وبقية كمية المانجة اللى عندى قطعتها عشان احشى بيها الكنافة وازين بيها الوجه

ونحط عليهم نصف الكنافة التانى ونضغط عليهم كويس

حطيت صينية الكنافة فى الفريزر عشان تتماسك وينفع اقلبها فى طبق التقديم
ولو متقلبتش فى الطبق معاكم بسهولة هاتو قطعة قماش مبلولة مياه سخنة ومرروها على الصينية من فوق هتتقلب معاكم بسهولة
وطبعا التزيين ده حسب الرغبة




وده شكلها من جوة بعد ماقطعتها

ملحوظة:طبعا الكنافة مستوية لأننا حمرناها مع السمنة على النار عشان فيه ناس بتفتكر عشان مدخلتش الفرن تبقى نية والكلام ده مش مظبوط خالص وفيه ناس بتعمل الوصفة دى بطرق مختلفة زى مثلا انها بتحط على الكنافة سكر بودرة وتعملها ديسك وتدخلها الفرن والحشو بيبقى كريم باتسيير او باسترى كريم بس انا حبيت اعملها بطريقة ابسط وأسهل
ويارب موضوعى البسيط ده يكون عجبكم